Искусеното и испробаното мора да се сподели! Нашата редовна читателка Анастасија го сподели со сите нас нејзниот одличен рецепт за ѓувеч и ни кажа дека навистина е совршен за подготовка на манџи за многу пократко време од обично. На ваше барање драги читатели, повелете супер рецепт за домашен ѓувеч!
Состојки:
- 3 кг кромид
- 2 кг моркови
- 2 кг модри патлиџани
- 4 кг зелени пиперки
- 4 кг домати
- 1,5 л масло
- 1 кесичка ловоров лист
- 2 кесички црн пипер во зрно
- сол по вкус.
Подготовка:
- Најпрво измијте ги морковите, модрите патлиџани, пиперките и доматите, а кромидот излупете го.
- Со помош на кујнска машина измелете ги состојките, но сите одделувајте ги во посебен сад затоа што тоа е важно за понатамошната термичка преработка.
- Започнете со пржење според редоследот по кој се наредени состојките. Пржете така што најпрво ќе го ставите да се пржи кромидот, па по 15 минути ќе ги додадете и морковите, па во наредните 15 минути треба да ги пржите патлиџаните. Додајте ги пиперките и повторно пржете 15 минути, па дојдајте ги доматите и исто така пржете уште 15 минути.
- При крајот на пржењето додадете го ловоровиот лист, црниот пипер и солта по вкус.
- Жешкиот домашен ѓувеч се собира во жешки тегли. Се чува на темно и ладно место.