Овој испробан рецепт за подготовка на домашна татлија со пресно сирење потекнува од Струмичкиот крај, а дознавме како може да ја направиме благодарение на Весна. Татлијата често се меша со раванијата, а подолу може да прочитате која е разликата помеѓу нив. Во секој случај, ова е десерт чиј вкус е одличен и лесно прифатлив за јадење!
Убаво е некогаш да прочитаме нешто на некој дијалект и да се потсетиме на карактеристиките на нашето поднебје. Па, коментарот на Весна ви го презентираме оригинално, а еве што вели: „Штом дојде пролетта во Струмица, се прави татлии со пресно сирење. Се прави за Прочка, за Велигден, но и во обични денови. Многу брзо се прави, ама сепак треба да ти се погоди, како велиме и на изглед, и на вкус и на шербет. Татлиита често се меша со равании. Но, разликата е огромна, раваниита не е со пресно сирење, а може да и се додаде ореви, бадеми… Татлијата е без додатоци и се прави со пресно сирење.“
Состојки:
- 4 јајца
- 1 филџан шеќер
- 600 гр пресно сирење
- 1 филџан масло
- 1 филџан гриз
- 2 филџани брашно
- 1 прашок за печиво
За шербет:
- 1 кесичка ванилин шеќер
- 1 лимон
- 1 кг шеќер
- вода по потреба – да го покрие шеќерот.
Подготовка:
- Се матат јајцата со шеќерот, но уште поубава е ако се матат одделно белките од жолчките.
- Се додаваат состојките и се меша убаво да се соединат.
- Се става во претходно намрсен плех/тава со големина бр. 30 (оваа на фотографијата е печена во тава бр. 28, па затоа е малку повисока).
- Се пече подолго време на 200, зависно од рерната, но како показател, треба да добие темна боја одозгора.
- Откако малку ќе се излади, се сече по желба.
- Се подготвува шербетот по вкус, се додава ванилата и лимонот исечен на кругови. Се потурва, врел шербет на малку изладена татлија, а потоа кратко се враќа во рерна, околу 10 минути.
Во врска со изгледот и вкусот, еве што друго дознавме од Весна: „Татлијата треба да биде темна одоздола и одозгора и жолта – килибар во средина, тогаш е погодена, по старинскиот рецепт. Вкусот со пресно или младо, несолено сирење е неповторлив! Колку подолго стои, поубава е. Може да ја чувате во фрижидер, покриена со транспарентна фолија.“ На здравје! Уживајте во секое залче пријатели!
Рецептот го испратил: Весна Рор, vesnarohrrecepti.com
Ви препорачуваме да прочитате: Традиционален рецепт за раванија со гриз.