Шампињоните се најлесно достапни од сите видови на печурки. Се користат во чорби, специјалитети со месо, пици, салати и каде ли уште не. Тие се особено корисни за нашето здравје, а акцентот за нивното позитивно влијание е на имунитетот. Во таа насока, ви предлагаме да ја пробате оваа салата со маринирани шампињони, која може да ја консумирате во зимскиот период и да си го подобрите вашето здравје во целост.
Овие маринирани печурки се феноменална салата за секоја пригода. Сигурни сме дека вашите гости нема да останат рамнодушни и ќе ви бараат рецепт, а во продолжение ви прикажуваме како може да ги направите!
Состојки:
- 1 ¼ шолја бујон од зеленчук
- ¼ шолја суво бело вино
- ½ ловоров лист
- 1 и ½ лажичка свежо оригано
- 1 и ½ лажичка свежа мајчина душица
- ¼ лажица толчена лута пиперка
- ½ лажица рендана кора од лимон
- 450 грама помали шампињони
- ½ зелена бабура исечкана на коцки
- 1 помала главица ситно сечкан кромид
- 1 помало чешне лук, ситно исечкан
- З лажици оцет балсамико
- 1 лажица киселина
- 1 лажица маслиново масло
- сол по вкус
- црн пипер по вкус.
*Препорака: Доколку немате свежи, може да користите и суви зачини.
Подготовка:
- Турете ги бујонот, виното, ловоровиот лист, ориганото, мајчината душица, кората од лимон и толчената пиперка, во доволно голем сад за да ги собере шампињоните. Ставете го садот на оган, па кратко зовријте ја смесата.
- Додека се загрева бујонот, исчистете ги шампињоните и скратете им ги дршките. Откако ќе ги исчистите додадете ги и нив во бујонот. Заедно нека вријат околу 5-6 минути, бидејќи течноста нема да ги прекрие шампињоните во целост, потребно е да се мешаат додека се варат.
- Откако ќе се поварат шампињоните, извадете ги со помош на лажица и ставете ги во поголема тегла. Во бујонот додадете ги пиперката, младото кромитче и лукот. Зголемете ја температурата и варете додека течноста се преполови.
- Во вака приготвената маринада додадете ги киселината, оцетот балсамико, маслиновото масло, солта и црниот пипер. Потоа, прелијте ги шампињоните и добро промешајте за печурките да се обложат со маринадата.
- Вака подготвените шампињони може да ги консумирате после 1 час, но највкусни се доколку отстојат неколку дена. Чувајте ги во фрижидер најмногу една недела. На здравје!
Ви препорачуваме да прочитате: Брзо мезе – полнети шампињони.