Популарната енчилада приготвена во кујната на Сѐ за храна! Време е за ново гастрономско уживање и дегустација на мексиканската кујна. Гурмански специјалитет со богат вкус, кој потекнува од 19-от век.
Подготовката на енчиладата е едноставна, а за нецел час ќе имате супер вкусен ручек за целото семејство. Набавете пилешки стек, Битолска павалка и тортиљи, па препуштете се на новото гастрономско доживување за кое гарантираме дека ќе му се допадне на целото семејство.
Состојки:
- 350 г пилешки стек
- 1 помала главица кромид
- 5-6 лажици масло
- 100 г Битолска павлака со 20% мм
- 200 г рендан кашкавал
- енчилада сос
- 7 тортиљи.
За енчилада сос:
- 1 коцка за супа од зеленчук
- 600 мл вода
- 250 мл доматен сос
- 1 мала лажичка оригано
- 1 мала лажичка чили зачин
- 1 мала лажичка тако зачин
- ¼ мала лажичка лук во прав
- 2 лажици брашно
- 1 лажица густин (нишесте)
- сол и мелен црн пипер по вкус.
Подготовка:
- Започнете со подготовка на енчилада сосот. Во сад на оган ставете 500 мл вода да се вари. Штом водата зоврие додајте ја коцката за супа. Варете 2 до 3 минути, а потоа додајте го доматиот сос, ориганото, чили, тако зачинот и лукот во прав.
- Во мал сад ставете ги брашното и густинот. Измешајте ги и додајте 100 мл ладна вода. Во сосот додајте го разматеното брашно и продолжете со варење околу 3 до 4 минути додека се згусти. Посолете и зачинете со мелен црн пипер по вкус.
- Пилешкиот стек исечкајте го на тенки ленти. Кромидот ситно исечкајте го.
- Во тава на оган ставете 2-3 лажици масло да се загреат. Во загреаното масло пропржете го стекот околу 3-4 минути, додека малку порумени. Извадете го од тавата.
- Во тавата додајте го преостанатото масло и ситно сечканиот кромид. Пржете го кромидот околу 5 минути, а потоа додајте го пилешкиот стек. Заедно пропржете ги уште 2-3 минути. Тавата тргнете ја од огнот и додајте 1 чаша од енчилада сосот и 100 г Битолска павлака. Измешајте за да се соединат, а на крај додајте 1 чаша рендан кашкавал.
- Во тавата за печење ставете 3-4 лажици од енчилада сосот.
- Врз секоја тортиља нанесете 1 лажица сос и 2-3 лажици од филот со пилешкото месо и павлаката. Тортиљата свиткајте ја како ролат и ставете ја во тавата за печење. Врз тортиљите ставете го преостанатиот енчилада сос. Рерната пуштете ја да се загрева на 200 степени и ставете ја енчиладата да се печи за време од 15 минути. Потоа, извадете ја од рерната и нанесете го преостанатиот рендан кашкавал. Продолжете со печењето уште 10 минути додека кашкавалот се растопи.
- Топлата мексиканска енчилада послужете ја веднаш. Уживајте во фантастичниот вкус со Сѐ за храна!
Препорака од авторот:
„Пикантно, со богата арома на доматен сос, меки тортиљи, кремасто пилешко и финиш на растопен кашкавал. Оваа мексиканска енчилада едноставно мора да се проба. Обожавам да испробувам различни јадења од интернационалната кујна, а овој пат се одлучив да ви го доловам вкусот на Мексико и во вашиот дом. Направете ја енчиладата, тагирајте ме на стори, објавете ја во групата на Сѐ за храна и пишете ми како ви се допаднала. Сигурна сум дека тоа ќе биде еден од вашите омилени рецепти.“ – вели Марија.
За сите прашања околу подготовката пишете и на Марија Кочовска (Facebook или Instagram) од нашиот тим која ја направи, фотографира и нѐ мотивира да го пробаме овој гурмански рецепт од мексиканската кујна.
Ви препорачуваме да прочитате: Запечени шампињони со павлака и кашкавал.
Следете ја sezahrana.mk и на Instagram и Pinterest.
*Спонзориран рецепт.