Повторно ве изненадуваме со уште еден вкусен и здрав рецепт од нашата кујна! Овој пат, инспирација ни беа здравите производи на Фила, со кои креиравме печени ќофтиња со тиквички и туна.
Меки, сочни и вкусни, овие ќофтиња се идеални за ручек во комбинација со сос, или пак може да ги ставите во сендвич. Не се пржат, а потребни ви се 20-тина минути да ги направите. Топло ви препорачуваме да ги пробате и сигурни сме дека ќе бидат дел од вашето мени. Без пржење, не содржат глутен, здрави и како што кажавме многу вкусни!
Состојки:
- 2 помали тиквички
- хималајска сол и мелен црн пипер по вкус
- 1 конзерва туна од 185 грама
- 1 лажица ленено семе од Фила (може да го купите тука, во поголемите маркети или продавници за здрава храна)
- 1 лажица ладно цедено сончогледово масло од Фила (може да го купите тука, во поголемите маркети или продавници за здрава храна)
- 2 јајца
- 2 лажици мелени овесни снегулки
- ситно сечкан свеж копар (може да користите и сушен копар) по вкус
- пченкарно брашно по потреба.
Подготовка:
- Тиквичките ги миеме и ги рендаме на крупната страна од рендето. Ги посолуваме и ги оставаме околу 10 минути.
- Потоа убаво ги цедиме од водата и ги ставаме во длабок сад.
- Туната ја цедиме од маслото и ја додаваме во садот со ренданите тиквички. Мешаме и ги додаваме лененото семе, ладно цеденото масло, јајцата, овесните снегулки и копарот. Повторно мешаме и посолуваме со сол и мелен црн пипер.
- По потреба во смесата додаваме мелени овесни снегулки. Важно е да се добие мека смеса. Со помош на поголема лажица земаме од смесата и формираме ќофтиња.
- Во чинија ставаме пченкарно брашно. Во садот со брашното ги валкаме ќофтињата од двете страни. Потоа ги редиме во тава обложена со хартија за печење.
- Ќофтињата од тиквичка и туна ги печеме во загреаната рерна за време од 15 минути или додека поруменат. Печените ќофтиња од тиквички и туна ги вадиме рерната и ги оставаме кратко да се изладат. Ги сервираме додека се топли со салата и сос по желба. На здравје!
Ви предлагаме да прочитате: Здрава пита со ленено семе и сончоглед.