Посно, вегетаријанско, без глутен и нискокалорично! И се заблагодаруваме на Катерина за овој лесен и брз рецепт за рестован компир, а што е најважно јадењето е здраво и богато со зеленчук како тиквичка, морков, кромид и лук. Затоа пробајте го и уживајте во компирите збогатени со аромата на магдонос и рузмарин.
Рестованиот компир може да го послужите со парче месо, а за време на пости или доколку сте вегетаријанец послужете го со свежа салата.
Состојки:
- 500 грама компири
- 1 главица кромид
- 1 тиквичка
- 1 поголем морков
- 1 лажица сецкан магдонос
- 1 неполна лажичка рузмарин
- 3 чешниња лук
- по потреба масло, мелен црн пипер, мешан сув зачин.
Подготовка:
- Компирите измијте ги и исечкајте ги на коцки. Во тенџере на оган, на средно висока температура ставете вода, посолете и додајте ги компирите да се варат. Штом водата зоврие, тенџерето затворете го со капак, а температурата намалете ја. Техниката за најдобро варење на компири прочитајте ја тука.
- Штом компирите ќе се сварат, исцедете ги и испасирејте ги.
- Кромидот и лукот ситно исечкајте ги. Морковите и тиквичката изрендајте ги на крупната страна на рендето.
- Во тава на оган со загреано масло ставете ги сечканиот кромид, изренданите морков и тиквичка и лукот. Пржете ги додека зеленчукот омекне, а потоа додајте ги сварените и испасирани компири, и сечканиот магдонос.
- Компирите зачинете ги со рузмарин, црн пипер и мешан сув зачин. Со постојано мешање убаво соединете ја смесата додека компирот почне да се умесува и да се одлепува од краевите на тавата.
- Приготвениот рестован компир послужете го додека е топол.
Рецептот го испратил: Катерина Милошевска Глигороска.
Ви предлагаме да прочитате: Печена посна тава од компири со фил од праз.